《麥兜．噹噹伴我心》－由最靚既豬腩肉到一塊扣肉……

《麥兜．噹噹伴我心》，笑中有淚，有幾個感動位，真係睇到眼濕濕，後來，喊佐。
都喺嗰句，謝立文既故事係俾成年既香港人睇既。除佐用佐好多舊歌（雪中情、人在旅途灑淚時、熱情的沙漠等），仲有好多內容小朋友應該唔明（恒指、蛇宴、要返大陸做野、好多樓、好貴），佢地會當係一部普通卡通片睇，大人睇有尐位都幾腰心腰肺。楊學德既核突畫功（唔係踩佢架，佢自己咁講架）同麥兜有好特殊既化學作用，我記得麥家碧講過畫人畫實景係佢既弱項，阿德既人物核突麻甩樣樣衰衰，但係又係冬日鴨鴨秋天蟬蟬既校友，或許，每個小朋友成長後都會有點麻甩…… 

仲有好多感想，不過唔寫住啦，再寫就有劇透…… 

（－－以上係我係facebook既短評，邦兄叫我寫多Ｄ，寫就寫啦……）

《麥兜．噹噹伴我心》係麥兜第四部電影。第一部《麥兜故事》，就係麥兜既故事；第二部《麥兜．波羅油王子》，就係麥炳（麥兜爸爸）既故事；第三部，《麥兜響噹噹》，應該係麥太既故事，但為佐進軍大陸，加佐好多近合大陸觀眾口味既野，有Ｄ不倫不類，是令我有點失望的一部。當然，身為謝立文既忠實fans，稔都無稔就入場睇《麥兜．噹噹伴我心》啦。

呢個係預告，未睇既可以睇下
 
第四部是校長的故事。套戲一開波，就將「便便」同「感動」連埋一齊，係一個好特別既比喻，但係又好貼切，套戲仲有好多地道廣東話爛gag。

（場內加映：開場講完「便便」就有片頭roller，一名小朋友大聲道：「乜咁快就做完架！」）

以下真係劇透，稔住睇既話，唔好睇住……

春田花花幼稚園，係大角咀一間普通過普通既幼稚園。故事一開頭，有人去幼稚園收數。校長一人身兼多職搵錢俾幼稚園。其中一份兼職喺名校「實肉框框幼稚園」校友籌款晚會做侍應，見到佢地班校友個個都係成功人仕，籌到好多錢，校長稔住「今次掂啦」，又搞個籌款晚會，之但係，校長既學生個個都係現實社會撈得唔係好掂，有個好似Maria既仲坐監唱「無自由，失自由」。結果籌得幾百蚊，雖然係咁，班校友都各自用自己既方法去表示支持校長（有人好似求佐道符！？）。最尾，成班校友仲一齊唱返首歌。

呢首歌，竟然感動到想黎呃票既蛇宴黨區議員吳曾昭順，原來佢都曾經鐘意過唱歌。於是就提議校長帶班細佬去做SHOW。春田花花合唱團，就係咁，為佐「江湖救急」成立。傻更更校長，想搵金牌經理人PK，但係最後要現實咁北上搵膠牌經理人大Ｍ。

膠牌經理人（鄭中基聲演）幫春田花花合唱團接佐好多job，唱佐好多歌。後來，唱佐首宣傳交通安全既廣告歌 《 車車車車 》 ，紅佐。


點知膠牌經理人拖數唔俾錢，Miss Chan見到校長傻更更唔識追數，嬲到走佐，剩低校長單打獨鬥，最後仲暈佐。

呢個時候，華仔要搵小朋友合唱團試音，miss chan出返黎幫手，班小朋友唱「我願似一塊扣肉，扣住你梅菜扣住你手；我是你一塊扣肉，你是我梅菜扣住你手。」華仔感動到便便。麥兜由最靚既豬腩肉變成一塊扣肉，少少搞笑，多多感動。（我相信呢首歌會成為結婚最受歡近既歌曲！） 最後春田花花合唱團同華仔巡迴演出。

 
稔住今次掂啦，點知，搞完幾場大龍鳯，又係得返一個桔，膠牌經理人炒燶股著草走路，校長都係無錢交租幼稚園要搞「結業」典禮。 幾分鐘裏面，由感動變絶望，仲發現膠牌經理人留低佐啲蘇州屎－－春田花花合唱團要去澳門表演。正路就唔鬼去啦，話晒校長都係苦主之一。不過傻更更既校長覺得應承佐人就要去，同班小朋友趕啊趕，一趕到去就即刻要表演。 一班小朋友淨係知呢次係最後一次演出，佢地盡力表演自己成名之作 《 車車車車 》 ，呢首歌係宣傳交通安全，成首都係「車車車車車你個老豆」。

校長miss chan只有滴汗的份兒。原來，呢個係一個葬禮。呢首歌，點都唔應該係葬禮唱啦……

估唔到，呢度係成套戲最感動既位……我喊佐。想知發生乜事，都係入場睇啦。

結局都係現實，係無奈既，不過又唔係絶望咁囉，學麥兜話齋，「係咁架啦，依個世界」。（呢句「係咁架啦，依個世界」出自小朋友既口，好笑得嚟其實好hurt！）結尾的歌 《 風吹雞蛋殼 》（唔係財散人安樂） ，好好聽，加埋大個佬麥兜既總結，好感人，內容唔太記得，但係俾首歌「撩下撩下」，我又喊佐。

追尋夢想既人，都係要有啲傻更更堅持，有「唔得咪返順德」既覺悟。我稔，就係有呢尐傻更更既人，我哋既世界先唔會咁死實實。楊學德既畫，代表殘酷既現實；麥家碧既畫，代表純真既情懷。佢地撞埋一齊，真係好啱謝立文既故事，學麥兜講返句：「正啊！」

另一樣「正啊！」，係戲入面有好多搞笑得黎又好好聽既音樂，估唔到pancakes既《中文歌》可以咁夾。最尾講到我哋無論開心唔開心既時候，都會有唔同既音樂陪住我哋。其實呢，麥兜波籮油王子既《 咁咁咁》係其中一首成日陪住我既歌，依家再多一首《風吹雞蛋殼》。真係好鐘意《風吹雞蛋殼》呢首歌，希望快啲出soundtrack啦！

題外話，套戲既字幕應該係用返普通話版本。因為好多笑話都係本地笑話，普通話版本改佐唔少，所以經常都出現講既野同字幕唔一樣，搞到我睇既時候好似睇緊雙聲道咁。呢套野好多笑話應該係香港人先明，你會見到尹光朱咪咪八両金係入面唱廟街口水歌，再講多次，「正啊！」。

呢篇blog，專登用廣東話寫，襯返麥兜。

最後，聽返首開場歌Beautiful dreamer：
 

同完場既《風吹雞蛋殼》日文原版《遠い日の歌》：



add on Aug 21:《風吹雞蛋殼》歌詞　(from https://www.facebook.com/mcdullmovie)

1. 日已散海角
風吹雞蛋殼
但在我心中照
還是昨日的曙光

月已掛肩膊
天蒼蒼星落索
在我心中唱
還是昨日少年歌

2. 日已退房角
困響房『嗷』頭殼
但在我心中照
還是昨日一線光

暴雨猛風撲
當雞蛋『堪』牆角
在我心中唱
還是昨日少年歌

3. 別了理想國
風吹雞蛋殼
但在我心中唱
還是昨日的輓歌

剩了個空殼
散蛋炒蛋角
但伴我到終結
還是昨日少年歌

（呢外，Canon in D真係一首百搭既歌……）